Engelse spelwoorde vir graad 4

Stil letters

Party Engelse woorde het letters wat jy skryf, maar nie hoor nie. In knee, knife en know is die k stil. In write en wrong is die w stil. In lamb, climb en comb hoor jy nie die b nie, en in listen nie die t nie.

Laat jou kind die woord ’n slag “verkeerd” uitspreek, met al die letters hardop. Dit klink snaaks, maar dit help om die stil letter te onthou.

Woorde wat op tion eindig

Die tion aan die einde van ’n woord klink soos “sjen”: station, nation, action. Afrikaans het baie van dieselfde woorde met “-sie” aan die einde, soos “stasie”, “nasie” en “aksie”. As die Afrikaanse woord op “-sie” eindig, eindig die Engelse woord dikwels op tion, soms op sion.

Meervoude

Die meeste Engelse woorde kry net ’n s in die meervoud. Maar ’n woord wat op ’n medeklinker en y eindig, kry ies: baby word babies. Woorde op f of fe kry dikwels ves: knife word knives, leaf word leaves. Woorde op x of s kry es: boxes, buses.

’n Paar meervoude volg geen reël nie: mouse word mice, tooth word teeth, foot word feet. Dié moet jou kind net ken. Oefen vyf minute per dag; die app bring die woorde wat verkeerd was weer terug.